Durrës, tatimet godasin bizneset pa kasa

Pas gjobave të vëna më parë dhe përsëritjes së fenomenit të mosregjistrimit të shitjeve, tatimorët kanë pezulluar aktivitetin e disa lokaleve pranë monumentëve të Dëshmorëve dhe lagjeve të tjera në qytet.

Shkëlqim Fortuzi, drejtor i Drejtorisë Rajonale të Tatimeve Durrës, bëri të ditur se nga strukturat e drejtorisë së hetimit tatimor, në bashkëpunim me sektorin e verifikimit në terren është bërë ekzekutimi i katër urdhrave të bllokimit të aktivitetit për katër subjekte tregtare në qytetin e Durrësit.

Subjektet e bllokuara kryejnë aktivitete në bar-restorantet e zonave më të frekuentuara të qytetit, si Rruga Tregtare dhe zona e Currilave. Këto subjekte janë penalizuar nga struktura e verifikimit në terren për mos lëshim të kuponit tatimor dhe pasi janë gjetur në shkelje për më shumë se 3 tri herë është bërë edhe bllokimi i veprimtarisë.

“Në rast se nga subjektet do të prishen shenjat dalluese të bllokimit të aktivitetit të vendosura nga administrata tatimore do të merret masa e konfiskimit të mallrave dhe kallëzimi penal në organin e prokurorisë. Urdhrat e bllokimit për këto subjekte janë nxjerrë, pasi ato janë gjendur në shkelje të nenit 122 të ligjit nr. 9920 i ndryshuar ‘Për procedurat tatimore në RSH’”, paralajmëroi Fortuzi.

Mësohet se kontrollohet do të vazhdojnë në të gjithë Durrësin, duke u përputhur me një fushatë kombëtare kundër ekonomisë informale.

Top Channel