“Rilindja Shqiptare”, programi i PS

Në dokumententin me 90 faqe, Partia Socialiste e ndërton programin mbi katër kolona kryesore, që janë: rimëkëmbja e ekonomisë, ripërtëritja e shoqërisë, rinvendosja e demokracisë dhe ribashkimi i Shqipërisë me Bashkimin Europian.

Për socialistet, të katërta shtyllat janë një sipërmarrje e jashtëzakonshme. Por, siç theksohet në  projektin e programit, Partia Socialiste është e bindur se në këtë sipërmarrje nuk do të jetë e vetme, por do të këtë në krah të saj kontributin dhe energjinë e çdo shqiptari, që dëshiron një rilindje të vendit. Ndaj që ne hyrje te programit socialistet shprehen te sigurt se do të arrijnë te ndryshojnë të ardhmen e atdheut.
Drafti nis me ekonominë, që sipas partisë socialiste po degradon cdo ditë e më shumë dhe gjithmonë e më shumë po i lë shqiptarët të papunë. Ndaj opozita premton hapjen e 75 mijë vendeve të reja të punës në vit, që do të thotë 300 mijë vende të reja pune në mandatin e saj të parë.

Kjo, sipas Partise Socialiste realizohet përmes krijmit të një modeli të ri ekonomik për zhvillimin e vendit, i cili synon kalimin nga një ekonomi bazuar tek konsumi i mallrave të importuara, emigracioni dhe informaliteti, tek një ekonomi që bazohet tek puna, prodhimi vendas dhe rritja e produktivitetit.

Për këtë, Partia Sociliste synon të ndërmarrë një sërë reformash rrënjësore. Së pari ndryshimin rrënjësor të politikës fiskale, që sipas Partisë Socialiste do të vihet në funksion të zhvillimit ekonomik e social. Programi parashikon uljen e kostos së jetesës për 95% të popullsisë, duke hequr barrën e taksës së sheshtë dhe duke vendosur drejtësi sociale përmes tatimit progresiv. Po kështu, politika e re fiskale do të ulë kostot e prodhimit bujqësor përmes krijimit të rrjetit kombëtar të grumbullimit dhe tregtimit të produkteve bujqësore, si dhe do të pesëfishojë financimet publike për sektorin e bujqësisë.

Paralelisht, programi parashikon uljen e TVSH-së për produktet ushqimore bazë, dhe bërjen zero të kësaj takse per miellin, bukën, qumështin, vezët dhe ilaçet. Një tjetër pikë mjaft e rëndësishme e programit për ekonominë është ajo që ka të bëjë me uljen e borxhit publik. Partia Socialiste angazhohet të mbajë nën kontroll defiçitin buxhetor brenda nivelit 3%, si një detyrim për të ulur borxhin publik që është bërë barrë e rëndë për popullin. Një tjetër pikë e rëndësishme është ajo e zgjidhjes së ngërcit të tejzgjatur të pronës, për të cilin opozita premton zgjidhjen përfundimtare.
Po kështu, brenda mandatit të parë, Partia Socialiste angazhohet të ndërtojë Shqipërinë pa plehra, siç e quan ajo. Opozita thotë se do të ndërtojë infrastrukturën moderne, që mbështet zhvillimin dhe afron Shqipërinë me Europën. Një çështje e rëndësishme në program i kushtohet turizmit si një sektor kyç.

Opozita thotë se do të hartojë dhe miratojë Planin e Përgjithshëm Kombëtar të Shqipërisë dhe masterplanin kombëtar për zhvillimin e turizmit. Po kështu burimet natyrore të vendit do të vihen në dobi dhe shërbim të publikut, çka nënkupton anulimin e të gjitha koncesioneve të paligjshme dhe rikthimin e transparencës së plotë në garat publike.

Shtylla e dytë, ajo e ripërtëritjes së shoqërisë synon ndërtimin e shtetit social. Përmes garantimit të shërbimeve publike solidare për të gjithë qytetarët, vendosjen e pagës minimale dhe minimumit jetik të garantuar dhe vendosjen e pensioneve jo më të ulëta se 40% e pagës mesatare.

Rivendendosja e demokracisë, kolona e tretë, parashikon rikthimin e zgjedhjeve të lira dhe të ndershme, reformimin e drejtësisë dhe çmontimin e korrupsionit.

Pjesa e katër dhe e fundit e programit synon afrimin e Shqipërisë me Bashkimin eueorpian, ku opozita premton përmbushjen e detyrimeve dhe marrjen e statusit të kandidatit. Programi i opozitës do të prezantohet tek qytetarët nga vetë zoti Rama përmes një turi të gjerë, ku do të merren edhe propozime apo ide të reja nga vetë ata.

Top Channel