Tiranë, aksident nga shpejtësia e madhe

Rreth orës 16:40 të së shtunës automjeti tip “Benz” ka lënë kryqëzimin në të majtë të ish-hotel “Dajti” duke devijuar nga rruga e njohur si unaza.

Në krahun përballë kishës katolike, në anën tjetër të Lanës, automjeti pasi ka goditur dy kalimtaret është përplasur me një furgon të linjës së Elbasanit, i ndaluar për të marrë pasagjerë.

Disa minuta pas ngjarjes qytetarja e zbehur në fytyrë e duke u dridhur nga shoku i shkaktuar tregon mometin e përplasjes.

“Ishte një moment, nuk di c’të them. Makina po vinte me shpejtësi, kur papritur u gjenda e shtrirë”, tregon ajo.

Ndërsa një qytetar, i cili ishte dëshmitar i të gjithë asaj që ndodhi, rrëfen momentin kur makina devijoi nga rruga. “E panë të gjithë. Ai u fut me shpejtësi. Lavdi zotit gratë shpëtuan”, tregon dëshmitari.

Oficerët e policisë rrugore të mëbërritur në vendngjarje kanë kryer menjëherë testin e alkoolit për drejtuesin e automjetit nga ku ka rezultuar se ai nuk kishte konsumuar alkool.

Jashtë kamerës oficerët e policisë rrugore pohuan se përplasja e dy qyetareve erdhi vetëm nga tejkalimi i limiteve të shpejtësisë.

Gjatë ditës së shtunë u regjistruan edhe dy aksidente të tjera rrugore. Njëri në Fier, ku një makinë shtypi një fëmijë dhe tjetri në Lushnje, ku drejtuesi i një automjeti humbi jetën pasi doli nga rruga.

Ndërsa ndër aksidentet më të rënda rrugore të ndodhur gjatë muajit në vend ka qenë ai në Durrës, ku një familje e tërë nga fshati Gjepalaj i Shijakut u shua në orët e para të 14 tetorit.

Automjeti me të cilin udhëtonin katër persona, dy bashkëshortë dhe fëmijët e tyre, doli nga rruga dhe përfundoi në një kanal.

Aksidenti ndodhi gjatë orëve të natës, por vetëm në mëngjes tragjedia u zbulua nga kalimtarët, që panë automjetin e përmbysur.

Top Channel