Gjyq vetëm me gazetarët

Ndërkohe KLD dhe Prokuroria e Përgjithshme që deklaruan se do kenë inspektime për këtë ngjarje ende nuk kanë një reagim.

Në një sallë bosh gjyqtarja Antonela Prendi e nisi proçesin gjyqësor ku shtetasi turk Abduselman Turgut është nën akuzë për largim pa leje nga vendi i vuajtjes së dënimit me apelin e palëve.

Në këtë apel mungonin edhe prokurori i çështjes edhe avokatja që mesa duket do caktohet kryesisht nga shteti pasi nuk ka asnjë gjurmë të 44 vjeçarit.

Gjyqtarja Prendi lexoi të vetmin njoftim të dorëzuar nga komisariati i policisë numër gjashtë në Tiranë, pra komisariati që mbulon zonën e Kamzës, dokument në të cilin thuhej se turku nuk është gjetur në këtë zonë.

Duke qenë se në sallë ndodheshin vetëm mediat dhe jo palët gjyqtarja njoftoi proçedurat që ajo ka urdhëruar të ndiqen më tej.

Si rrjedhim gjykata ka urdhëruar kërkimin e shtetasit turk nga policia shqiptare e cila duhet të depozitojë një shkrese të sigluar se ai nuk gjendej në Shqipëri.

Turku i kërkuar në Gjermani për trafik droge, nuk është arratisur nga burgu, por nga një banesë pa adresë, në të cilën Gjykata e Apelit e siguroi në arrest shtëpie.

Gjykata e Apelit pranoi edhe pretendim e moskonsiderimit si shkresë zyrtare të email-it nga shteti gjerman i cili kërkonte ekstradimin e tij.

Nuk ka ende një version të Prokurorisë nëse ka mbërritur materiali zyrtar i ekstradimit të turkut nga Gjermani, megjithëse për momentin Prokuroria ka bërë rekurs në Gjykatën e Lartë për rikthimin e turkut në qeli, proçes i cili ende nuk është marrë në shqyrtim për shkak të shtyrjeve nga mungesa e avokatëve.

Top Channel